Breaking News
ನಾಗರಹೊಳೆ ಪ್ಲಾಸ್ಟಿಕ್‌ ಮುಕ್ತಗೊಳಿಸಲು ಕ್ರಮ

ನಾಗರಹೊಳೆ ಪ್ಲಾಸ್ಟಿಕ್‌ ಮುಕ್ತಗೊಳಿಸಲು ಕ್ರಮ

ಹುಣಸೂರು : ನಾಗರಹೊಳೆ ರಾಷ್ಟ್ರೀಯ ಉದ್ಯಾನದ ಒಳ ಮತ್ತು ಹೊರ ಆವರಣವನ್ನು ಪ್ಲಾಸ್ಟಿಕ್‌ ಮುಕ್ತಸ್ವಚ್ಛ ಅರಣ್ಯವನ್ನಾಗಿಸಲು ವಿಶೇಷ ಕಾರ‍್ಯಕ್ರಮ ರೂಪಿಸಲಾಗಿದೆ ಎಂದು ಹುಲಿ ಯೋಜನೆ ಕ್ಷೇತ್ರ ನಿರ್ದೇಶಕ ಆರ್‌.ರವಿಶಂಕರ್‌ ತಿಳಿಸಿದರು.
”ನಾಗರಹೊಳೆ ರಾಷ್ಟ್ರೀಯ ಉದ್ಯಾನದಲ್ಲಿ ಜೂ.5ರ ವಿಶ್ವ ಪರಿಸರ ದಿನಾಚರಣೆಯಂದು ವಿವಿಧ ವಲಯಗಳಲ್ಲಿ ಪರಿಸರ ಪೂರಕವಾದ ಕಾರ‍್ಯಕ್ರಮಗಳನ್ನು ಹಮ್ಮಿಕೊಂಡಿದ್ದು, ವೀರನಹೊಸಹಳ್ಳಿ, ಮತ್ತಿಗೋಡು, ನಾಣಚ್ಚಿಗೇಟ್‌, ಸುಂಕದಕಟ್ಟೆ ಗೇಟ್‌ಗಳಲ್ಲಿ ಸಫಾರಿ ಹಾಗೂ ಪ್ರವಾಸಿಗರಿಗೆ ಇಲಾಖೆ ವತಿಯಿಂದ ಪರಿಸರ ಸ್ನೇಹಿ ಬಟ್ಟೆ ಬ್ಯಾಗ್‌ಗಳನ್ನು ವಿತರಿಸಲಾಗುವುದು,” ಎಂದರು.

”ಪ್ರವಾಸಿಗರು ಬಳಸುವ ಪ್ಲಾಸ್ಟಿಕ್‌ ವಸ್ತುಗಳನ್ನು ಉದ್ಯಾನದೊಳಗೆ ಹಾಗೂ ಹೊರಗೆ ಬಿಸಾಡದೆ ವಾಪಸ್‌ ಚೀಲದಲ್ಲಿ ಕೊಂಡೊಯ್ಯಬೇಕಿದೆ, ಈ ಬ್ಯಾಗ್‌ಗೆ ನಿಗದಿತ ಶುಲ್ಕ ವಿಧಿಸಲಾಗುವುದು. ಇದನ್ನು ಪ್ರಾಯೋಗಿಕವಾಗಿ ಸುಂಕದಕಟ್ಟೆ, ವೀರನಹೊಸಳ್ಳಿ, ನಾಣಚ್ಚಿಗೇಟ್‌ಗಳಲ್ಲಿ ಜಾರಿಗೆ ತರಲಾಗುವುದು. ಮುಂದಿನ ದಿನಗಳಲ್ಲಿ ಎಲ್ಲೆಡೆ ವಿಸ್ತರಿಸಲಾಗುವುದು,” ಎಂದು ಹೇಳಿದರು.
ಮಕ್ಕಳಿಗೆ ಪರಿಸರ ಅರಿವು: ”ಪರಿಸರ ದಿನಾಚರಣೆ ಅಂಗವಾಗಿ ಎಲ್ಲ ವಲಯಗಳಲ್ಲಿ ಹತ್ತಿರದ ಶಾಲಾ ಮಕ್ಕಳನ್ನು ಕರೆಸಿ, ಪರಿಸರ ಉಳಿಸುವ, ಅರಣ್ಯ-ವನ್ಯಜೀವಿ ಸಂರಕ್ಷ ಣೆ ಹಾಗೂ ಅರಣ್ಯವನ್ನು ಬೆಂಕಿಯಿಂದ ರಕ್ಷಿಸುವ- ಪ್ಲಾಸ್ಟಿಕ್‌ ಮುಕ್ತ ಅರಣ್ಯ ನಿರ್ಮಿಸುವ ಬಗ್ಗೆ ಮಾಹಿತಿ ನೀಡಲಾಗುವುದು. ಅಲ್ಲದೆ ಅಕ್ಕಪಕ್ಕದ ಹಳ್ಳಿಗಳಲ್ಲಿ ಪರಿಸರ ಜಾಗೃತಿ ಜಾಥಾ ನಡೆಸಲಾಗುವುದು. ಎಲ್ಲಡೆ ವಿದ್ಯಾರ್ಥಿಗಳಿಂದಲೇ ಸಸಿ ನೆಡುವ ಕಾರ‍್ಯಕ್ರಮವಿದೆ,” ಎಂದು ತಿಳಿಸಿದರು.

Leave a Reply

Your email address will not be published.